Kvistur frá Skagaströnd

Kvistur gefur stór og myndarleg hross. Hann gefur fríðleika á höfuð, augun eru vel opin og eyrun fínleg. Hálsinn er grannur, langur og mjúkur við háar herðar en mætti stundum vera reistari í reið. Baklínan er góð, bakið er vöðvafyllt og lendin öflug. Afkvæmin hafa að jafnaði úrvalsgott samræmi; mikla fótahæð og sívalan, langvaxinn bol. Fótagerð og réttleiki eru í meðallagi og hófar þokkalegir. Prúðleiki er jafnan góður. Afkvæmin eru takthrein, skrefmikil og lyftingargóð á tölti en mættu sum vera burðarmeiri á hægu. Brokkið er skrefmikið og all rúmt. Vekurð er oftast til staðar og er skeiðið þá gripamikið. Stökkið er teygjugott og hátt. Afkvæmin hafa góðan reiðvilja og fara myndarlega í reið. Kvistur gefur fríð, framfalleg og ganghrein alhliða reiðhross sem eru glæsileg á velli. Kvistur hlýtur fyrstu verðlaun fyrir afkvæmi og fyrsta sætið.